يبدأ تقديم الطلبات للقرعة العشوائية لهجرة 2010 فى الثالث من شهر اكتوبر2008 ممكن تتقدم يومين او تتأخر يومين دة بمزاجهم و يستمر التقديم لمدة ستون يوما بالتمام و الكمال و معنى كلمة هجرة 2010 يعنى الفترة من شهر اكتوبر 2009 الى نهاية سبتمبر 2010هى دى تعتبر هجرة 2010 يبدأ التقديم لها فى اكتوبر 2008 يعنى السنة دى و تكون قرعة عشوائية بين دول العالم كلها بإستثناء الدول التى وصل عدد المهاجرين منها خلال الخمس سنوات الاخيرة الى 50.000 مهاجر و طبعا دة لا ينطبق على ايه دوله عربية متخافوش انا متابع التقديم للهجرة العشوائية مجانى 100% من خلال موقع http://www.dvlottery.state.gov/لكن طبعا الموقع متوقف هذة الايام حتى فتح باب التقديم لهجرة 2010و علشان تقدر تعرف انك مؤهل و الا لأ اولا لازم تكون امضيت 12 سنة فى التعليم يعنى يكون معاك دبلوم او ثانوية عامة على الاقل و دة يعتبر نفسة سافر لو كسب فى القرعة او يكون معاك شهادة خبرة فى مهنة تحتاجها الولايات المتحدة خبرة لمدة سنتين على الاقل و المهن دى بتتغير كل سنة حسب متطلباتهم و بيعلنوا عنها و من خلال استمارة التقديم اكتب كل معلوماتك الى هما طالبنها بكل صراحة ووضوح لان الجماعة الامريكان دول مقفلين شوية و لو لقوا اجابة مختلفة شوية عن الحقيقة بيعتبروا دة كدب و ما ينفعش معاهم الاعذار المصرية ابدا يعنى ممكن يعملوا مصايب الدنيا كلها عادى انما الكدب يبقي مش هتدخل امريكا عمرك ثم تتصور صورة فى استوديو محترم يكون المصور فيه بيفهم و تقولوا عاوز صور 5×5 سم و لما تسحبهم على الاسكانر يكون وضوح الصورة 300×300 اللى اسمها ريزيليوشن و ما تنساش لو كنت متزوج و حتى لو مش ناوى تاخد معاك حد لازم تذكر انك متزوج و عدد اولادك كمان و بالمناسبة لو الواحد متزوج و زوجتة متعلمة تبقى فرصتة افضل لانة ممكن يقدم طلبين و تزيد فرصة قبولة يعنى طلب باسمة و زوجتة مرافقة معة و طلب باسم زوجتة و هو مرافق معاها انما اوعى حد يقدم اكتر من طلب باسمة لوحدة لان بكدة بيحذفوا كل طلبات سيادتك و تفضل تتابع صفحات الموقع بتاع التقديم لغاية ما تظهر لك رسالة التهنئة بانك تم تسجيلك طيب نعرف منين اننا كسبنا يبدأ ارسال خطابات الفوز بالقرعة فى منتصف شهر ابريل من السنة التالية و حتى نهاية شهر يوليو و لا يوجد وسيلة اخرى لمعرفة الفائزين غير الخطاب اللى بيوصلك و بالبريد العادى كمان بعد كدة لو كسبت بإذن الله بيكون موجود جوة الخطاب استمارات بعدد الاسماء الفائزة يعنى انت و اى مرافقين معاك و بتملا الاستمارات دى و ترسلهم تانى بسرعة الى عنوان فى ولاية كنتاكى الامريكية و العنوان اساسا موجود على استيكر جوة الجواب اوعى حد يبعت لمحلات الفراخ اللى عندنا كنتاكى دى ولاية امريكية فيها الهيئة اللى مسئولة عن موضوع القرعة العشوائية طبعا فى الخطاب دة هتلاقى اسمك و رقم فوزك بالقرعة لو لقيت رقمك اقل من 25.000 احمد ربنا لان كدة فرصتك فى السفر كبيرة طيب لية مش الهجرة مطلوب 55.000 فى سحب النتيجة بيسحبوا بدل 55.000 بيسحبوا 100.000طيب ليه لان ممكن يكون فيه حد بيلعب على النت و لقى الموقع قام مسجل فيه و كتب اى حاجة و كسب واحد تانى يسجل و يكتب عنوان غلط فالجواب ما يوصلهوش و امثلة كتيرة فوق دة كله هتلاقى فى جدول المقابلات بالسفارة الامريكية بالقاهرة عدد السودانيين اللى بيخلصوا ورقهم من القاهرة اكتر من عدد المصريين لان طبعا السودان فيها مشاكل فبيعملوا مقابلاتهم فى مصر المهم بعد ما تبعت الجواب الى كنتاكى تبدأ المقابلات فى اول اكتوبر من السنة اللى جالك فيها الجواب الاول يعنى اكتوبر 2009و حتى نهاية سبتمبر 2010و المقابلات حسب ترتيب ارقام الهجرة قبل ميعاد المقابلة بتاعتك هتلاقى جالك جواب تانى فية استمارات الكشف الطبى و التطعيم و الاشعة و هتلاقى فية ميعاد المقابلة و ممكن تتابع ميعادك على الانترنت قبل ما يصلك الجواب التانى دة من موقع السفارة فى مصرhttp://cairo.usembassy.gov/consular/iv8.htm طبعا اماكن الكشف الطبى و التطعيمات و الاشعة فى اماكن السفارة هى اللى محدداها علشان محدش يلعب بديلة و لو فكرت تدى الدكتور قهوتة و تقولة لو عندك حاجة يصهين عنها هايبيعك و يحط لهم جواب بالكلام دة فى اوراقك اللى بتاخدها منه مغلقة و فى السفارة هما اللى بيفتحوها اصلة مش هيضحى بالتعاقد مع السفارة الامريكية علشان حضرتك و بعدين بتروح المقابلة فى ميعادك بتلاقى ناس زى الفل بيستقبلوك و احسن معاملة و لو عايز تكون المقابله كلها بالعربي مفيش مانع و الله الموفق اه نسيت المصاريف اولا التقديم مجانى ثانيا الكشف الطبي للفرد الواحد ممكن يوصل 800 جنية شامله الاشعة و التطعيمات لو الدكتور سألك جالك جدرى مائي قبل كدة و انت صغير ( لو كان حصل قول الحقيقة علشان لو قلت لا هيطعمك ضد الجدرى كمان) و بعدين مصاريف المقابة للشخص الواحد السنة دى 775 دولار و ياريت تعمل حسابك فى دولارات و انت داخل المقابلة علشان لو معاك فلوس مصرى هتلاقى الدولار جوة بستة جنية مع انه فى البنك 5.33 تقريباو ربنا يوفقنا جميعا و اسف على الاطالة و اتمنى انى اكون كفيت ووفيت
منقول من موقع www.dvd4arab.com
ليست هناك تعليقات:
إرسال تعليق